ယနေ့နံနက်ပိုင်း(ဇူလိုင်
၃ရက်နေ့) တွင် လွတ်ငြိမ်းချမ်းသာခွင့် အမိန့်ဖြင့် ကလေးအကျဉ်းထောင်မှ ပြန်လည်
လွတ်မြောက်လာသော ကိုအေးအောင်အား ကလေးမြို့ရှိ တည်းခိုရာ နေအိမ်၌
တွေ့ဆုံမေးမြန်းခဲ့ပါသည်။ ကိုအေးအောင်သည် ၁၉၉၈ ခုနှစ်တွင် ထိန်းသိမ်းခံရပြီး ၁၉၉၉
ခုနှစ်တွင် ပုဒ်မ ၅(ည)၊ ၁၇/၁ နှင့် ၁၇/၂၀ တို့ဖြင့် ထောင်ဒဏ် ၅၉ နှစ်
ချမှတ်ခံခဲ့ရသူ ဖြစ်ပါသည်။Ref:EMG
မေး။ ။ဒီနေ့ ထောင်ကနေ လွတ်မြောက်လာတာနဲ့ ပတ်သက်ပြီး ကိုအေးအောင်ရဲ့ စိတ်ခံစားမှုကို ပြောပြပါ ။
ဖြေ။ ။လွတ်မြောက်တယ်ဆိုတာကဗျာ ထောင်ထဲကနေပြီး ပေငါးရာပတ်လည်တော့ ထွက်လာပြီပေါ့။ လွတ်မြောက်မှု ဆိုတာကို နားလည်တာက လုံခြုံမှုဆိုတာရှိမှ လွတ်မြောက်တယ်လို့ နားလည်ပါတယ်။ လုံခြုံမှု ဆိုတာက ဒေါ်အောင်ဆန်းစုကြည်တို့ အားလုံးပြောကြသလို တရားဥပဒေစိုးမိုးမှု အပေါ်မှာ မူတည်တာပါ။ အဲလိုဆိုတော့ တရားဥပဒေက ကျွန်တော့်ကို အကာအကွယ်ပေးပြီလားပေါ့။ ဆိုလိုတာကဗျာ ကျွန်တော် ကြားရတယ်၊ ကျွန်တော့်သူငယ်ချင်းတွေ ပတ်စ်ပို့ မရဘူး။ တချို့တွေ ကျောင်းပြန်တက်ခွင့် မရဘူး ။ တရားဥပဒေက သူတို့ကို အကာအကွယ်ပေးသလား မပေးဘူးလား။ ဥပဒေက အကာအကွယ်ပေးမှ လုံခြုံမယ် ၊ လုံခြုံမှ လွတ်လပ်မယ်လို့ ဒီလိုပဲ နားလည်ပါတယ်။
မေး။ ။ထောင်ကနေ ထွက်လာပြီး ဘာဆက်လုပ်မယ်လို့ စိတ်ကူးထားသလဲ။
ဖြေ။ ။ လောလောဆယ်တော့ လေ့လာရေး လုပ်ရမှာပေါ့ ။ အရင်တုန်းက ကျွန်တော်တို့ နိုင်ငံရေး လုပ်ခဲ့တယ် ဆိုတာက ၊ ဖြိုဖျက်တဲ့ အပိုင်းပေါ့။ ဖြိုဖျက်တဲ့ အပိုင်းမှာက သတ္တိက အဓိက ၊ ပညာက ဒုတိယ။ အခုဟာက တည်ဆောက်ရေး အပိုင်းဆိုတော့ ပညာက အဓိက ၊ သတ္တိက ဒုတိယဖြစ်သွားမှာပေါ့။ ပညာမရှိဘဲနဲ့လုပ်မယ်ဆိုရင် ဘာမှ အဓိပ္ပါယ် မရှိဘူး။ ဒါ့ကြောင့် လေ့လာရေးတွေ အများကြီး လုပ်ကြရအုန်းမှာဘဲ ။
မေး။ ။ ထောင်မကျခင်က ကျောင်းသားဘ၀ အနေနဲ့ ဖြတ်သန်းခဲ့တယ်ဆိုတော့ ဘယ်အတန်း အထိ ပညာသင်ကြားခဲ့ပါသလဲ။
ဖြေ။ ။ တတိယနှစ် ရူပဗေဒ အဓိက နဲ့ အဝေးသင်ကျောင်းသား တစ်ဦးပါ။
မေး။ ။ လေ့လာရေး လုပ်မယ်ဆိုတော့ နိုင်ငံရေးထဲကို လေ့လာသွားမှာလား ၊ ပညာရေးကိုပဲ သီးသန့် လေ့လာသွားမှာလား။
ဖြေ။ ။ ကျွန်တော် ဆိုလိုတဲ့ လေ့လာရေးက နိုင်ငံရေးပညာ လေ့လာရေးပါ။ ကျောင်းပြန်တက်တယ် မတက်ဖူးဆိုတာက ကျွန်တော့ အသက်မွေးဝမ်းကျောင်း အတွက် ဖြစ်မှာပေါ့။ နိုင်ငံရေးဆက်လုပ်ဖို့ ဆိုရင် နိုင်ငံရေးပညာကို ဆက်လက်လေ့လာဖို့ လိုအပ်မှာပါ။
မေး။ ။ နိုင်ငံရေး ဆက်လုပ်မယ်ဆိုရင် ကိုအေးအောင်အနေနဲ့ ပါတီတစ်ခုခုနဲ့ ချိတ်ဆက်လုပ်မလား။ ကိုယ့်ဘာသာကိုယ် တစ်သီးတစ်သန့်ပဲ လုပ်မလား ၊ ဘယ်လို အဖွဲ့အစည်းနဲ့များ ချိတ်ဆက်လုပ်သွားမလဲ။
ဖြေ။ ။ အဲဒါက စဉ်းစားဖို့ အချိန်ယူရအုန်းမှာပါ။
မေး။ ။ လက်ရှိ နိုင်ငံတော်မှာ အပြောင်းအလဲတွေ အများကြီး ဖြစ်ပေါ်နေတယ်လို့ ပြောနေပါတယ်။ အပြောင်းအလဲကာလ ကိုသွားနေပါတယ်လို့ နိုင်ငံတကာကလည်း သတ်မှတ်နေတဲ့အချိန် ကာလမှာ အကိုရဲ့ အမြင်လေးကို ပြောပြပါ။
ဖြေ။ ။ အပြောင်းအလဲ ဖြစ်တယ်ဆိုတော့ စာတွေထဲမှာ ဖတ်ရတယ်ပေါ့။ အပြောင်းအလဲဖြစ်ပြီ၊ ဟီလာရီ ကလင်တန်တောင် လာပြီပေါ့။ စသဖြင့်ပေါ့။ ကျွန်တော်က ထောင်ထဲမှာ ရက်စွဲတော့ မမှတ်မိဘူးပေါ့။ ဦးသိန်းစိန် ကျမ်းသစ္စာကျိန်ဆိုပြီပေါ့။ နောက်နေ့ ဆိုတော့ ဒီမိုကရေစီ နိုင်ငံတော်ပေါ့ ၊ ဒါနဲ့အဲဒီနေ့ မနက်မှာ ထောင်ထဲမှာ ကျွေးတဲ့ တာလဘောကို စောင့်ကြည့်ပါတယ်။ ထောင်ထဲက “တာလဘော” ဆိုတာက ဟင်းသီးဟင်းရွက်ပြုတ် ကျွေးတာပေါ့ ။ အာဏာရှင်စနစ်က တာလဘောနဲ့ ဒီမိုကရေစီစနစ်က“တာလဘော” ဘာကွာမလဲလို့ သိချင်လို့ စောင့်ကြည့်တယ်။ လာကျွေးတဲ့ “တာလဘော” က အတူတူပါပဲ။ အခု ကျွန်တော် ဂျာနယ်တွေထဲမှာ ဖတ်ရတဲ့အခါ ကြတော့လည်း ကာတွန်းတွေ စသဖြင့် အကုန်လုံးမှာ ဖတ်ရတယ်။ အပေါ်မှာ ပြောင်းနေပြီ အောက်ခြေမှာ မပြောင်းသေးဘူး တဲ့ ၊ များသောအားဖြင့် ဒီလို ပြောကြတယ်။ ကျွန်တော်ကတော့ အပြင်လောကနဲ့ ရင်မဆိုင်ရသေးပါဘူး။ ကျွန်တော် ဖတ်ရသလောက်ကတော့ အပေါ်မှာတော့ ပြောင်းသွားပြီ အောက်ခြေမှာတော့ မပြောင်းသေးဘူးပေါ့။ ဒဲရစ်မစ်ချဲ ကလည်း change in the air လို့ ပြောတယ်လို့ ဖတ်လိုက်ရတယ်။ လေထဲမှာတော့ ပြောင်းနေပြီပေါ့ ။ ကျွန်တော်တို့ ထောင်ထဲမှာ ကျွေးတဲ့ “တာလဘော” ကတော့ မပြောင်းသေးပါဘူး။
မေး။ ။ ကိုအေးအောင်တို့ ထောင်ထဲမှာ ဂျာနယ်တွေ၊သတင်းစာတွေ ဖတ်ရတယ် လို့ သိရတယ်။ ဒီလို ဖတ်ရှု့ခွင့်ရတဲ့ အပေါ်ကနေပြီး သိခွင့် ရတဲ့ အတိုင်းအတာထဲကနေ ပြီး အစိုးရအသစ် အပေါ်မှာ အမြင်ကို ကျွန်တော့ကို ပြောပြပါ။
ဖြေ ။ ။ ကျွန်တော်တို့က ဂျာနယ်တွေကိုပဲ အများဆုံး ဖတ်ခဲ့ရတယ်လေ။ ဂျာနယ်ထဲမှာ ဘာတစ်ခုဖတ်ရလဲ ဆိုတော့ ဒေါ်သန်းမြင့်အောင် ပြောတာ။ ဒေါ်သန်းမြင့်အောင်က ဘာပြောလဲ ဆိုတော့ ဒေါ်အောင်ဆန်းစုကြည်က အကောင်းမြင်ရင် ကျွန်မတို့ကလည်း အကောင်းမြင်မယ်။ အခု သမ္မတကြီး ဦးသိန်းစိန်က အပြောင်းအလဲကို တကယ် လိုလားပါတယ်လို့ ဒေါ်အောင်ဆန်းစုကြည် က ယုံကြည် တယ်ဆိုတော့၊ ဒေါ်အောင်ဆန်းစုကြည်ကို နိုင်ငံရေးအရရော ၊ ပုဂ္ဂိုလ်ရေး အရ ကော ကျွန်တော်တို့က ယုံကြည်တယ်၊ ဒါ့ကြောင့် ဒေါ်အောင်ဆန်းစုကြည် အကောင်းမြင်ရင် ကျွန်တော်တို့လည်း အကောင်းမြင်မယ်။ အပေါ်မှာတော့ ပြောင်းလဲမှု ရှိတယ်လို့ ယူဆပါတယ်။ ဒါပေမယ့် ကျွန်တော် ဆိုလိုတာက အဲဒီအပြောင်းအလဲဟာ အောက်ခြေတော့ မရောက်သေးပါဘူး။
မေး။ ။ထောင်ကနေ ထွက်ပြီးတော့ နိုင်ငံရေးထဲကို ပြန်လည် လုပ်ဆောင်မယ်လို့ ပြောပါတယ်။ နိုင်ငံရေး ကို ပြန်လည် လုပ်ဆောင် သွားတဲ့ အခါ ကြတော့ ဘယ်လိုပုံစံနဲ့ သွားမလဲ။ ဘယ်လို ခံယူချက်မျိုးနဲ့ သွားမလဲ။
ဖြေ။ ။ ကျွန်တော်တို့ လူငယ်ဘ၀ မှာ နိုင်ငံရေးကို နားမလည်ဘဲ နဲ့ ထောင်ကျခဲ့တာပါ။ ဒါပေမယ့် ထောင်ထဲမှာ လေ့လာတယ်၊ တိုင်းပြည်အတွက် နိုင်ငံရေး လုပ်ဖို့ လိုအပ်ပါလား ဆိုတာ သိလာရတယ်။ ကျွန်တော် နိုင်ငံရေးလုပ်ချင်တယ်။ ဒီလိုဆိုတော့ လူကြီးတွေဆီမှာ နိုင်ငံရေးဆည်းပူးတယ်။ စာတွေ ဖတ်တယ်။ ဒါပေမယ့် ကျွန်တော် နားလည်တာက နိုင်ငံရေးထဲမှာ ပါဝင် ဆောင်ရွက်ချင် ပါတယ်လို့ ဖြေပေမယ့် ပါဝင်ဆောင်ရွက်ဖို့ အဆင်သင့် မဖြစ်သေးပါဘူး။ ကျွန်တော် လုပ်ချင်တဲ့ နိုင်ငံရေးပညာ လေ့လာချင်တယ် ဆိုတာက ကျွန်တော့် ဦးတည်ချက်ပါ ။ ၉၈-ခုနှစ် ကျွန်တော် ထောင်ကျတဲ့ အချိန်တုန်းက အိုင်တီ နည်းပညာတွေ နဲ့ မထိတွေ့လိုက်ရဘူး။ အိုင်တီနည်းပညာတွေ လေ့လာဖို့ လိုအပ်နေတယ်။ ဒါကတော့ မလွဲမရှောင်သာ ဘာအလုပ် လုပ်လုပ် လေ့လာ ရမယ့်ဟာ တစ်ခုပေါ့။ ဒီနှစ်ခုကို ဇောင်းပေးလုပ်မယ်။ နောက်စားဝတ်နေရေး လုပ်ရမှာပေါ့။ ဒါတွေ အားလုံး အဆင်ပြေခဲ့ရင် ပညာရေး တပိုင်းတစဟာကို ဆက်လက် သင်ကြားဖို့ ဆောင်ရွက်နိုင်ရင် ဆက်လုပ်မယ်။ မလုပ်နိုင်ရင်လည်း မလုပ်ဘူးပေါ့ ။ ဒါပေမယ့် နိုင်ငံရေးမှာ ပါဝင်ဆောင်ရွက်နိုင်သူ ဖြစ်ဖို့ အတွက် နိုင်ငံရေးပညာကို လေ့လာဖို့ အတွက်ကတော့ ဦးစားပေး ဆုံးဖြတ်သွားမှာပါ ။ ဘယ်အဖွဲ့အစည်းတွေနဲ့ ဘယ်လိုဆောင်ရွက်မလဲ ဆိုတာကတော့ အချိန်ပေး စဉ်းစားရမှာပါ။ လေ့လာရအုန်းမှာပါ။
မေး။ ။ အခု အချိန်မှာ လူငယ်တွေ နိုင်ငံရေးမှာ စိတ်ပါဝင်စားစွာ ပါဝင်ဆောင်ရွက် နေကြပါပြီ။ အဲဒီလို လုပ်နေကြတဲ့ လူငယ်တွေ အပေါ်မှာ နိုင်ငံရေးနဲ့ ပါတ်သက်လို့ ဘာများပြောချင်ပါသလဲ။
ဖြေ။ ။ နိုင်ငံရေး ဆိုတာက ပညာတစ်ခုပါပဲ ၊ စိတ်ဓါတ်ရှိရုံနဲ့ တိုင်းပြည်ကောင်းစေချင်တဲ့ စေတနာရှိရုံ နဲ့ စွန့်စား အနစ်နာခံရုံ သတ္တိရှိရုံနဲ့ ၊ လုပ်လို့ မရတဲ့ အရာတစ်ခုပါ ။ ပညာလိုပါတယ်။ အဲတော့ လူငယ်တွေ အနေနဲ့ လေ့လာရမယ်။ လူကြီးတွေဆီက သမိုင်းထဲက အတွေ့အကြုံတွေကို လေ့လာရပါ့မယ်။ လူငယ်တွေအနေနဲ့ လေ့လာဖို့ တိုက်တွန်းလိုပါတယ်။ စာများများ ဖတ်ကြပါ။
မေး။ ။ ထောင်ထဲမှာ နေထိုင်ခဲ့ရတဲ့ (၁၄)နှစ်နီးပါး ကာလအတွင်းမှာ စစ်အစိုးရ လက်ထဲမှာရှိတဲ့ ထောင်တွင်း အခြေအနေ နဲ့ အစိုးရ အသစ် ပြောင်းလဲလာပြီး ကာလ နောက်ပိုင်းနဲ့ ထောင်တွင်း အခြေအနေ ကွာခြားမှုလေး ကိုပြောပြပါ။
ဖြေ။ ။ ထူးခြားကွာခြားမှုတွေ ရှိပါတယ်။ ဒါပေယ့် အဲဒီ ထူးခြားမှုတွေက ပုဂ္ဂိုလ် အပေါ်မှာပဲ မူတည်နေပါတယ်။ ဆိုလိုတာက ဒီထောင်ပိုင်ကောင်းရင် ကောင်းတယ်။ ဒီဆရာဝန်ကောင်းရင် ကျန်းမာရေး စောင့်ရှောက်မှုတွေ ကောင်းမယ်။ ဒါပေမယ့် ဒီဆရာဝန် မဟုတ်ဘဲ နောက်ဆရာဝန် ဆိုရင် တစ်မျိုးဖြစ်သွား ပြန်ရော။ ဆိုလိုတာက ဥပဒေ စိုးမိုးမှုပေါ့ ၊ ဥပဒေစိုးမိုးမှု မရှိလို့ ပေါ့။ Rule မရှိလို့ ပေါ့ ၊ စနစ်မရှိလို့ပေါ့ ၊ အဲဒါကမမှန်ဘူး။ ဒါပေမယ့် မပြောင်းလဲဘူးလား ဆိုတော့ ပြောင်းလဲပါတယ်။ အဲဒါက ပုဂ္ဂိုလ်ပေါ်မှာပဲ မူတည်နေတယ်။ တပြေးညီ အားလုံးပြောင်းလဲအောင် လုပ်တာ မတွေ့ရဘူး။ ဒီထောင်မှာ ဗွီဒီယိုကြည့်ရတယ် ဟိုထောင်မှာ မကြည့်ရဘူး ၊ ဟိုထောင်မှာ ပန်းချီတွေ ဘာတွေဆွဲပြီး တောင်ပို့တယ်။ ဒီထောင်မှာ စာရေးဖို့တောင် ခက်နေတယ်။ ကျွန်တော်တို့ ထောင်မှာ တော့ ပြောင်းလဲ တိုးတက်မှုတွေ ရှိသင့်သလောက် ရှိနေတယ်။ တခြားထောင်တွေမှာ ကိုယ့်ထက်ပိုပြီး ရနေတဲ့ အခွင့်အရေးတွေ မရတာတွေလဲ ရှိနေပါတယ်။ ညီမျှတဲ့ ဥပဒေ တစ်ခု မရှိဘူးလို့ ထင်ပါတယ် ။ ဒါပေမယ့် အခုပြောနေတာက ဂျေးမင်နယူနယ် ကိစ္စကို ပြောနေတာ။ နေမှု၊ ထိုင်မှု တိုးတက်လား၊ မတိုးတက်ဘူးလား၊ ရပိုင်ခွင့်တွေ အကုန်ရသလား မရသလား၊ ကျွန်တော်တို့ အဓိက ထားသင့်တာက အကျဉ်းထောင်ပေါ်လစီပဲ ၊ အကျဉ်းထောင် လက်စွဲ ဥပဒေထက်ပိုပြီး အဓိကထားသင့်တယ်။ ကျွန်တော်ကတော့ အကျဉ်းထောင်ပေါ်လစီ မရှိဘူးလို့ ခံစားရတယ်။ ဘာလို့လဲဆိုတော့ အခု ကိုလိုနီစရိုက်ကိုဖျောက်၊ အမျိုးသားရေးဖြင့် တည်ဆောက်ဆိုပြီး အရင်တုန်းက ဆိုင်းဘုတ် ကပ်ထားတယ် ၊အခု မကပ်တော့ ပြန်ဘူး၊ ကိုလိုနီစရိုက်ဖျောက်ဖို့ မလိုတော့လို့ ဆိုင်းဘုတ် မရှိတော့တာလား ဖျောက်ပြီးသွားလို့ မရှိတော့လို့ လားတော့ မသိဘူး။ ကိုလိုနီစရိုက်ကို ကျွန်တော်တို့ နားလည်တာက ပထွေးဆိုးပေါ့ ၊ သားက ဟင်းခိုးစားတဲ့ အခါမှာ ဒေါသနဲ့ ရိုက်လိုက်တာ၊ ဟင်းကုန်သွားလို့ ရိုက်လိုက်တာ၊ သူစားစရာမရှိတော့လို့ ရိုက်လိုက်တာ ။ ဒီကောင်ကောင်းလာဖို့ မကောင်းလာဖို့ မရှိဘူး ၊ မိဘကလည်း ဟင်းခိုးစားလို့ ရိုက်တာပဲ ၊ ဒါပေမယ့် လိမ္မာစေချင်လို့ ရိုက်တာ ၊ ရိုက်တာခြင်း မတူဘူး။ ဆိုလိုတာက အခုထောင်ထဲကို လူတွေရောက်လာတယ် ဖမ်းထည့်လိုက်တယ်။ ခိုးမှုနဲ့ရောက်လာတယ်။ သူ့ကို ဘာကြောင့် မခိုးသင့်တယ်ဆိုပြီး ဘာပြုပြင်ရေး မှ မရှိဘူး။ အကျဉ်းထောင် ပေါ်လစီသည် အမျိုးသားရေးဖြင့် တည်ဆောက်ဆိုရင် ၊ ကျွန်တော်တို့ ရဲ့ သားသမီးတွေ ကျွန်တော်တို့ ကိုယ်ချင်းစာရမယ်။ ကျွန်တော်တို့ တိုင်းရင်းသားတွေ ကျွန်တော်တို့ အချင်းချင်းတွေ ၊ ကိုလိုနီအစိုးရ မဟုတ်ဘူး ၊ အင်္ဂလိပ်အစိုးရ မဟုတ်ဘူး ၊ ဒီလူတွေဟာ လူ့အဖွဲ့အစည်းကို ပြန်သွားအုန်းမှာ ၊ ပြန်သွားတဲ့ အခါမှာ လူ့အဖွဲ့အစည်းရဲ့ အသုံးဝင်တဲ့သူတွေ ဖြစ်အောင် ကျွန်တော်တို့ အကျဉ်းထောင်က ဘာတွေ လုပ်ပေးလဲ ၊ ဘာမှ လုပ်မပေးဘူး၊ အလုပ်ထွက်ခိုင်းတာပဲ ရှိတယ် ဒါပေမယ့် သက်မွေးဝမ်းကျောင်းသင်တန်း သင်ပေးတာ မဟုတ်ဘူး ၊ ထောင်မှာသူတို့ကို ပြုပြင် ပြောင်းလဲတဲ့ လုပ်ငန်း ဘာမှ မရှိဘူး ၊ ပြောစရာ တစ်ခုတော့ ရှိတယ်။ မနက်နဲ့ ညတန်းပိတ်ခါနီးရင် ၃၈ဖြာ မင်္ဂလာ ဆိုရတယ်။ ဒါကိုလည်း ၃၈ ဖြာမင်္ဂလာကို ဆိုဖို့ အတွက် နှိုးဆော်တဲ့ ၀န်ထမ်းက သူနှိုးဆော်တဲ့ စကားလုံးက “ ကဲ မိုက်မယ်ဟေ့ ၊ မိုက်မယ်ဟေ့” တဲ့ ဗျာ ၊ အဲဒီကျမှ အားလုံးက တစ်ညီတစ်ညွတ်ထဲ “လူမိုက်ဆိုလျှင် ရှောင်သွေလွဲလို့ .....” စသဖြင့် ဆိုတာပေါ့ဗျာ။ အကျဉ်းထောင် ပေါ်လစီကို အမျိုးသားရေးဖြင့် တည်ဆောက်ဆိုတဲ့ စကားလုံးကို တကယ် အသက်ဝင် စေချင်ပါတယ်။
No comments:
Post a Comment