·
ဒီမိုကရေစီဖော်ဆောင်ရေးကာလတွင်
အုပ်ချုပ်ရေးအဖွဲ့ များ သွေး လန့်သွားမည့် အပြုအမူများကို ထိန်းထိန်းသိမ်း သိမ်း
ဆောင်ရွက် သင့်ကြောင်း ၈၈ မျိုးဆက်ကျောင်းသားခေါင်းဆောင် ကိုမင်းကိုနိုင်က ယနေ့
ကျင်းပပြုလုပ်သော ငြိမ်းချမ်းရေးခရီးစဉ် သတင်းစာ ရှင်းလင်းပွဲ တွင်
ပြောကြားခဲ့သည်။ဒီမိုကရေစီအလေ့အကျင့်များကို အစိုးရက ယခုမှ စတင် အကောင် အထည်ဖော် ကျင့်သုံးနေသဖြင့် အဖွဲ့အစည်း အသီးသီးနှင့် ပြည် သူ လူထုတို့အနေဖြင့် စိတ်ရှည်သည်းခံသင့်ကြောင်း ဆက်လက်ပြောကြား သည်။
"ဒီမိုကရေစီဖော်ဆောင်ရေးမှာ အစိုးရပိုင်းကလည်း နားလည်ဖို့လိုတယ်။ စာအုပ်ကြီးတိုင်း ကိုင်ပေါက်နေတာမျိုး မလုပ်သင့်ဘူး"ဟု ကိုမင်းကိုနိုင် ကပြောသည်။
၈၈
မျိုးဆက်ကျောင်းသားများ၏ ငြိမ်းချမ်းရေးနှင့် ပွင့်လင်းခရီးစဉ်များ
သတင်းစာရှင်းလင်းပွဲကို စက်တင်ဘာလ ၂၄ ရက်နေ့က ၈၈ မျိုးဆက်ကျောင်းသားများရုံးခန်း၌
ကျင်းပပြုလုပ်ခဲ့ကြောင်း သိရသည်။
အဆိုပါ သတင်းစာရှင်းလင်းပွဲတွင် ၈၈ မျိုးဆက်ကျောင်းသားများ
သွားရောက်ခဲ့သော ခရီးစဉ်များဖြစ်သည့် မုံရွာလက်ပံတောင်းတောင် ခရီးစဉ်၊
ကချင်ပြည်နယ် ဖားကန့်ခရီးစဉ် စသည့်ခရီးစဉ်များနှင့် စပ်လျဉ်း၍
ရှင်းလင်းပြောကြားမှုများ ပြုလုပ်ခဲ့ခြင်းဖြစ်ကြောင်း သိရသည်။
လက်ပံတောင်းတောင် ကိစ္စနှင့် ပတ်သက်၍ သွားရောက်ခဲ့သူ ၈၈
မျိုးဆက်ကျောင်းသားများ အဖွဲ့မှ ကိုဂျင်မီက "လက်ပံတောင်းတောင် အပါအ၀င်
ချင်းတွင်းမြစ် ဒေသတစ်လျှောက်မှာ သဘာဝပတ်ဝန်းကျင် ထိန်းသိမ်းမှုက အတော်လေး
အားနည်းနေတာကို တွေ့ခဲ့ရတယ်။ လက်ပံတောင်းတောင် ကိစ္စနဲ့ပတ်သက်လို့ ကျွန်တော်တို့စီစဉ်ထားတာ
တစ်ခုရှိပါတယ်။ လက်ပံတောင်းတောင်နဲ့ ချင်းတွင်းသဘာဝကို ကာကွယ်နိုင်အောင်
ကျွန်တော်တို့က ပညာရှင်တွေပါဝင်တဲ့ ဆွေးနွေးပွဲတစ်ခု လုပ်ဖို့ရှိပါတယ်။
ပတ်ဝန်းကျင် ထိန်းသိမ်းရေး ပညာရှင်တွေ၊ သက်ဆိုင်ရာ တာဝန်ရှိသူတွေ၊ ကုမ္ပဏီက
တာဝန်ရှိသူတွေ၊ ကိုယ်တွေ့ကြုံနေရတဲ့ ရွာသူရွာသားတွေရဲ့ကိုယ်စား ကိုယ်စားလှယ်တွေကို
ဖိတ်ခေါ်ပြီး သူတို့ရဲ့အသံတွေကို ကြားနိုင်အောင် ပြုလုပ်သွားမှာပါ။ အသေးစိတ်ကိုတော့
မစီစဉ်ရသေးပါဘူး။ နောက်ထပ် မန္တလေးမြို့နဲ့ မုံရွာမြို့တွေမှာပါ ထပ်လုပ်နိုင်ဖို့
ကြိုးစားသွားမှာပါ" ဟု ၎င်း၏အတွေ့အကြုံများကို ရှင်းလင်းတင်ပြခဲ့သည်။
ပတ်ဝန်းကျင် ထိန်းသိမ်းရေးနှင့် ပတ်သက်၍၊ ဒေသခံ ပြည်သူများနှင့်
ပတ်သက်၍ သတိကြီးကြီးထားပြီး အကောင်းဆုံး လုပ်ဆောင်သွားမည် ဖြစ်ကြောင်း ၎င်းက
ဆက်ပြောခဲ့သည်။
ကချင်ပြည်နယ် ဖားကန့်ခရီးစဉ်နှင့် ပတ်သက်ပြီး "ဖားကန့်ဒေသဟာ
ပေးဆပ်ခဲ့ရတာနဲ့ မတန်အောင် လမ်းတွေက ဆိုးရွားလွန်းပါတယ်။ အန္တရာယ်များတဲ့
လမ်းတွေကြားထဲမှာ သွားလာနေထိုင် နေကြရပါတယ်။ ကျွန်တော်တို့ အဲဒီဒေသမှာရှိတဲ့
ပြည်သူတွေ၊ စစ်ဘေးဒဏ်သင့်နေရတဲ့ ပြည်သူတွေအတွက် သက်ဆိုင်ရာ တာဝန်ရှိသူတွေကို
လက်မှတ်ရေးထိုး လှုပ်ရှားမှုတွေ ပြုလုပ်ခဲ့ပါတယ်။ အဲဒီဒေသမှာရှိတဲ့ သူတွေဟာ ငြိမ်းချမ်းရေးနဲ့
စစ်မက်ဘေးနှစ်ခုကို နှိုင်းယှဉ်ရွေးချယ်တဲ့ နေရာမှာ သူတို့ပါဝင်ခဲ့ကြတယ်။
နောင်လာမယ့် ကာလတွေမှာလည်း နှစ်ရှည်လများ အဖြေရှာမရဖြစ်နေတဲ့ တိုင်းရင်းသား
လက်နက်ကိုင်တွေနဲ့ အစိုးရတာဝန်ရှိသူတွေကြားမှာ တတ်နိုင်သမျှ အဖြေရှာနိုင်ဖို့
ပါဝင်သွားဖို့ရှိပါတယ်" ဟု ၈၈ မျိုးဆက် ကျောင်းသားခေါင်းဆောင်
ကိုမင်းကိုနိုင်က ပြောကြားခဲ့ပါသည်။
ဖားကန့်ဒေသ ငြိမ်းချမ်းရေးနှင့် ကချင်ပြည်နယ် ငြိမ်းချမ်းရေးအတွက်
ပြည်သူများ၏ မေတ္တာရပ်ခံချက်တွင် ဖားကန့်ဒေသတွင် လက်ရှိဖြစ်ပေါ်နေသော ပဋိပက္ခသည်
တစ်လကျော် ကြာမြင့်ခဲ့ပြီဖြစ်ကြောင်း၊ ပဋိပက္ခအတွင်းတွင် အစိုးရတပ်မတော်သားများ၊
ကချင်လွတ်မြောက်ရေး တပ်ဖွဲ့များအပြင် ဒေသခံပြည်သူများ၏ ထိခိုက်ဒဏ်ရာရမှု၊
အသက်ဆုံးရှုံးမှုများလည်း ဖြစ်ပေါ်နေကြောင်း၊ စစ်ဘေးဒုက္ခကြောင့် ဒုက္ခသည်စခန်း
အသီးသီးတွင် နေထိုင်နေရသော စစ်ဘေးဒုက္ခသည် ပြည်သူ (၉၀၀၀) ရှိနေပြီဖြစ်ကြောင်း၊
လက်ရှိဖြစ်ပေါ်နေသော လက်နက်ကိုင်ဖြေရှင်းမှု၊ စစ်ပွဲများအစား တွေ့ဆုံညှိနှိုင်း
ဖြေရှင်းခြင်းသည်သာ ပြည်ထောင်စု ငြိမ်းချမ်းရေးအတွက် စစ်မှန်သော အဖြေရှာခြင်းသာ
ဖြစ်ကြောင်း၊ နှစ်ဖက်သော တာဝန်ရှိသူများ အနေဖြင့် အမြန်ဆုံး အပစ်အခတ် ရပ်စဲပေးရန်၊
လမ်းပန်းဆက်သွယ်မှုများ ပြန်လည်ဖွင့်ပေးရန်၊ ဒေသခံပြည်သူတို့၏ လုံခြုံရေးကို
ဖြည့်ဆည်းပေးရန်နှင့် ဖားကန့်ဒေသနှင့် ကချင်ပြည်နယ်တွင် အမြန်ဆုံး ငြိမ်းချမ်းရေး
ရရှိနိုင်ရေးအတွက် တွေ့ဆုံညှိနှိုင်း ဆောင်ရွက်ပေးရန် မေတ္တာရပ်ခံအပ်ပါကြောင်း
စသည်တို့ ပါဝင်ကြောင်း သိရသည်။
No comments:
Post a Comment